去首尔，拣酒店最紧要就脚，咁先可以日行夜行疯狂扫货！明洞区一直是不少人的心水选择，因为係市中心，酒店多而且附近又有得行街。不过如果问问住过在 明洞酒店 的朋友仔，都会答你：「下不为例」，而网上的首尔Blogger及韩国专家，都好少会推荐大家住明洞，而我作为韩国线记者都绝对唔建议，因为住过一次就知中晒伏！今日同大家讲真话，力数住明洞的5大罪状，除非你好想去的景点就在明洞附近，如果唔係？拣其他区的酒店吧！

记者： A君的泡菜日誌

01| 难搭车！去边都唔方便！

讲真！好多人都以为明洞係市中心，所以去其他地方都好方便！完全错误！虽然首尔地铁四通八达，但由明洞出发，去弘大、新村、梨大、安国、江南、狎鸥亭、光化门等热门景点，全部都一定要转车！要知道首尔搭地铁转车要出闸入闸好複杂，地铁线路图又密密麻麻，转错车出事率极高，所以第一次去首尔的朋友仔，住明洞真係不是一个好选择！反而推介要住在地铁2号线沿线，因为去弘大、梨大、新村、合井、东大门、往十里、江边（汉江）、江南等，搭地铁2号线就去去，超方便！

02| 嘈到爆！酒店真係劲多人！试过旅行旺季去首尔朝7晚10做嘢，夜晚11点先拖住疲累的身躯返明洞酒店，一踏入酒店门口就知出事，因为真係好多人，全部强国大叔大妈係大堂鬼杀咁嘈，排队（误？）争入上房，最终等咗成30分钟……谂住返到房无事？错！旁边房大妈用丹田吹水吹足几个足，上层大叔又不停叫嚣，最后扰攘到3、4点先开始安静，我表示超无奈！最惨係……大叔大妈兵团醒早6点又出发，超高声浪劲过闹钟！所以去旅行想舒舒服服休息，旅行旺季时千祈咪拣明洞！

03| 绝对不是行街首选地点

拣得住明洞，好多人都係因为贪方便，谂住一落酒店就可以行街！但事实係……去过明洞就知绝对唔係行街的好地方！虽然妆物店林立，但款式唔特别，行街时又逼劲多人，最后行一阵已想放弃！女仔都仲可以去买妆物，男仔就真係只可行Aland、8 Seconds、ABC-MART等，选择超级少，最后行1、2个钟已经想转去弘大、梨大等地方，已经肯定永不回头！所以点解要为一个只会行一阵的地方，而住喺果度呢？

04| 最嬲！成日俾人当係强国子民！

哇！呢样真係终极难顶！因为你在明洞任何舖头，都一定会被当成强国人！虽然大家都明白店员讲普通话係想方便沟通，但当你用唔鹹唔淡的普通话或英文回应时，佢地一察觉係係香港人，就一定会黑面+是但招呼+睇唔起你+觉得你阻住做生意，宁愿去招呼会爆买的真。强国人，咁嘅服务态度实在令人嬲到爆！其实明洞多数係连锁服饰或美妆店，其他地区都一定搵到，为何要留在明洞受气？而酒店员工亦会当你是强国人招呼，眼藐藐令人难受！我发誓，从此不会住明洞！

05| 突然发现，好少便利店！

大家去明洞时，有无注意到一件事，就係明洞区好少便利店！平时一条街总有一两间GS25、CU、7Eleven，在明洞竟然会神秘消失，行两三条街都唔见有！可能因为被大财团收购成商场、服饰店及美妆店，便利店真係买少见少，当然唔係间间酒店都係咁，但便利店出现率绝对係偏低！所以住明洞夜晚想食雪条食宵夜，落到街要靠Google Map，行成几分钟先搵到便利店，实在唔多方便啰！

延伸阅读：平游首尔！旺季住宿$400就有！